三百蚊一兩的傻傻哋,深水埗才有的松記

Share Button

凌晨臨時起意,想食糖水,即刻攞埋把遮,著埋拖鞋 ,穿過橙色的欽州街,走去三姐松記。作為一枚深水埗地膽,如果你問我邊度食平靚正的傳統糖水?我一定答三姐松記。

松記,香港有好多間,三姐松記,就得元州街呢間。深水埗的糖水鋪,我都算食曬,話知你,糖水佬、綠林都係廢。綠林,好甜,價錢 ok,姐姐態度麻麻地,食唔出同出邊其他有咩分別。糖水佬,我最後一次幫襯係食川貝燉雪梨,真係一舊梨掟入一灘水,我瞬間決定今次係最後一次。講真,而家的糖水,真係 literally sweet water,又淡,又好甜,淡係食材求其,甜係落勁多糖。濫竽充數,內容空洞,用甜麻痺你的味覺,同教育局派糖比舊屎你食有乜分別。

松記燈仲亮,無曬d客,店員哥哥姐姐仔坐係度relax,傾緊解。我探頭問:仲做生意呀嘛?通常我都係呢個鐘出現,我地已經好熟,佢地熱情招呼我入來。

糖水而家差唔多賣曬,熱嘢就凈低紅豆沙同埋杏仁糊。平日我通常嗌腐竹白果。三姐松記的腐竹,update 咗我對腐竹的認識。我先發覺原來我以前食果d根本係糖水溝腐竹。 佢地的腐竹係有內容的腐竹,唔甜, 融得啱啱好,唔會一舊舊,味道醇厚,白果好煙韌,加埋白雪雪的雞蛋,凈係得一個字,潤。

我一路食緊紅豆沙,陳皮中和咗紅豆的膩,帶出一種清香。哥哥仔問我感覺,我話陳皮味好重,重過出面好多。哥哥仔笑說,我地落三百蚊一兩的陳皮,人地都話佢地傻傻地,但一百蚊果d真係唔掂。又問,知唔知綠豆沙要落乜?我估:海帶?佢話,而家香港人鐘意食海帶綠豆沙,其實係錯嘅,應該要加臭草。臭草?我都係第一次聽。聽講有d客一路食一路驚奇:真係有舊草喎!香港人對傳統糖水的認識真係越來越少。d客食糖水求其,係因為未試過咩叫誠意的味道。呢度的師傅做舊式糖水有廿年,有d上咗年紀的客來了興致,考佢地:紅豆沙仲要落d乜?答:糯米。客笑:識做。

食吓食吓就快一點鐘,有個阿叔經過,佢地主動招呼,阿叔問有無西米露呀?仲有,佢去拎,一路同我講,有個貨van司機頭先打比佢,話佢揸緊車過來,要芝麻糊,準備定,一落車就拎走。

講到車,哥哥仔同我講考巴士牌的故事。原來佢好鐘意揸車,揸唔同類型的車,collect 唔同的車牌,佢考咗私家車牌、的士牌、舊年仲考咗巴士牌。佢話果一個月好搏,夜晚返工到一點鐘,日日六點幾起身,考到之後,返咗一日工,mission completed,辭職。佢話:我揸過一日白板車呀!仲比我睇佢揸白板車的相,著埋綠色制服添。我驚奇:原來你唔單係糖水佬,仲係巴士佬!你已經係歷史的一部分!

偶遇白板車的故事,我已經覺得好抵。比錢果陣,我問幾錢,深夜優惠,八蚊。於是返咗黎,我決定寫呢篇我想寫好耐的文。我推薦三姐松記糖水,因為佢堅持傳統糖水的精髓:匠人精神。

【三姐松記糖水】

地址:深水埗元州街151號地下

(港鐵長沙灣站 A2 出口,步行約5分鐘)

電話:2386 5835

營業時間:14:30 – 01:30

 

Leave a Reply